Voorwoord

Voorwoord (Lees asb eers, indien dit u eerste keer by hierdie blog is, anders kan u gerus met die blad afrol ondertoe om by die blog uit te kom)

Daar het ‘n gedagte in my opgekom toe ek nog redelik jonk was, dat alles wat geskryf of gedruk is nie die volle waarheid is nie. Later het ek besef dat alles wat gelees kan word, bestaan uit kaf en korrels. Nog later het ek besef dat niks in die materie volmaak is nie, daarom kan geen geskrif net uit korrels bestaan nie. Die geskrifte wat jy voor jou het, liewe leser, moet asseblief op dieselfde grondslag beoordeel word. Ek vra jou nie om alles wat jy lees te aanvaar nie, maar soek die korrels volgens jou begrip en gewete uit.
Ongeveer halfpad deur my lewe het ‘n argument, in ‘n baie goeie gees met ‘n goeie vriend van my plaasgevind. Die vriend is ‘n seviele ingenieur en ons het gepraat oor ‘n ontwerp van ‘n staalbalk wat verkry kan word deur ‘n bestaande I balk tandvormig te sny en dan die “tande” op mekaar vas te sweis om ‘n groter balkdiepte en dus ‘n groter dravermoë te verkry.

Fig. 1
‘n Solide I balk word tandgewys gesny en dan word die twee helftes teenoor mekaar geskuif en weer aan mekaar gesweis om weer ‘n dieper I balk te vorm.
Fig. 2
Die vergrote I balk wat meer as 3 keer die dravermoë van die oorspronklike balk sal hê, sonder dat die gewig vermeerder.

Hierdie mag vir die leek ‘n bietjie te tegnies wees, maar wees egter geduldig, ek probeer die verskil in siening verduidelik.
My argument was dat sweislas S nie te kort mag wees nie, want dit sal tot gevolg hê dat die las gaan skuifskeur (shear). Hy het gesê daar is nie daardie soort spanning in die middel van ‘n balk nie. Eintlik was ek met my matriek ‘n bietjie vermetel om met ‘n ingenieur te stry oor iets in sy vakgebied. Ons verskil het gekom omdat ons die voorwerp verskillend gesien het. Hy het Fig. 2 as ‘n eenheid gesien, wat dit werklik was! Daarteenoor het ek dit as twee aparte balke gesien, omdat as sweislas S korter word, beweeg dit nader na 0, wanneer dit werklik twee balke is. Op een of ander lengte van die sweislas sou dit skuifskeur. Die ingenieur het later toegegee dat ek reg was, maar dit is nie van belang nie. Wat ek probeer tuisbring is dat verskillende mense op verskillende maniere na ‘n geskrewe stuk kyk en ek gaan geensins ‘n leser kwalik neem indien hy of sy van my verskil nie.
Dat ek met die geskrifte op mense se tone gaan trap is onvermydelik, maar as dit nie die geval was nie; waarom skryf ek dan? Indien die leser net ‘n paar “korrels” ontdek, is ek verheug en weet ek dat dit die moeite werd was. Sien tog maar die teenstrydighede oor, soos wanneer ek bv. snedigheid veroordeel terwyl ek self dikwels snedige dinge skryf. Ek self is baie ver van volmaak af, sien tog maar die foute oor.
Ook is ek nie ‘n taalkundige nie en daar is beslis baie ruimte vir verbetering, om vloeiende leesgemak te verseker, maar ek vra tog dat verandering versigtig gedoen moet word, aangesien ‘n woord verandering ‘n bedoelde begrip verlore kan laat raak.

Thursday, February 11, 2016

Voortdurende aanvulling



Voortdurende aanvulling

            Niks in die materie kan voortbestaan indien daar nie aanvulling van energie is nie.
            Hierdie energie – in watter vorm ookal – kom van 'n sentrale Bron, wat deur Wysheid beheer word. Hierdie Wysheid is die Skepper.
            Genesis 1:3 "En Elohim het gesê: Laat daar Lig wees! En daar was Lig." Eintlik moes Moses geskryf het: "EK IS LIG!" [Of is die ewigheidsbegrip te veel vir mense?] Uit daardie geestelike Lig is alles wat bestaan. Daaruit word alles onderhou wat bestaan. Daaruit is alle materie geskep; of beter, die energie is omvorm of gestol tot materie.
            Die Primêre Energie is volmaak soos die Wysheid en bestaan uit Lig, Lewe en Liefde. Dit is net inperkbaar deur en reageer slegs volgens die wil van die Skepper. Dit beweeg deur alles tot waar dit volgens die Wil benodig word. In die sonne word dit in sekondêre energie [materie] omgeskakel en dit voorsien energie aan die materiële skepping, waar die energie beperk word tot die snelheid van lig. Is die snelheid van lig die ‘muur’ wat materie ‘omring’? Nee, daar is ‘n ander ‘muur’, maar dit sal later behandel word.
            Alle voortbestaan van die natuur is afhanklik van voortdurende aanvulling. Alle kennis is afhanklik van voortdurende aanvulling. Alle sekondêre energie is afhanklik van voortdurende aanvulling. Dis alles hernubaar deur die sentrale Wysheid.
            Die "boom van kennis"? Dit was nie, soos algemeen aanvaar om die verskil tussen goed en kwaad te ken nie. Dit was 'n boom van goeie kennis en slegte kennis. Baie van die aanvullende kennis het 'n verkeerde oorsprong! Hou in gedagte dat die skepping van materie plaasgevind het na die rebellie van Lucifer en sy volgelinge in die geestelike opset. Daar is nou twee magte aan die werk.
            Materie is geskep om die gevalle siele 'n geleentheid te gee, om terug te keer vanaf die verkeerde tot die regte. Lucifer probeer dit verhoed deur verkeerde kennis by die mense in te voer. Mense is van nature geneig om die raad van Lucifer te aanvaar, omdat dit sinlik genotvol is.
            Die mense se siele is hoofsaaklik van die gevalle wesens, wat 'n begeerte tot verbetering gevoel het, as gevolg van die ellendige toestand waarin hulle was. Die vergunning is gegee, die geheues uitgewis en 'n nuwe bestaan in die materie lê voor. Waarheen siel? Waarheen gaan jy nou? Jy het tog 'n vrye wil! Is jy gelukkig om ouers te hê, wat hulle vrye wil gaan aanwend om jou met wysheid te beïnvloed? Groei jy op in 'n tydperk van goeie beginsels en stabiele samelewing? Of in die worstelstryd teen die bygeloof van die middeleeue? Of in die ontwikkelde maar geestelik verrotte 21ste eeu? Wat ookal jou omstandighede – jy het ‘n vrye wil – jy kan besluit waarna jy soek. Soek jy die aanvulling van die Skepper of soek jy die aanvulling van Lucifer?
            Die Skepper het 'n deeltjie van Hom in jou geplaas [van sy Gees] met die doel om jou te ontwikkel, sodat jy, siel, 'n deeltjie van Hom kan word. Het jy al kennis gemaak met Hom in jou, of is jy te besig met die materie waarin jy jou bevind? Jy het 'n vrye wil, jy kan luister na wie jy wil. Maak jy Sy Gees jou vriend en raadgewer, is dit 'n ewige vriendskap. Maak jy die materie jou vriend en Lucifer jou raadgewer, is dit 'n tydelike vriendskap wat eons kan duur tot jy weer 'n geleentheid met 'n vrye wil kry.
            Douw vd Merwe het gesê: "Die Skepper gee kennis aan mense op die regte tyd." Die opmerking is in pas met die begrip van voortdurende aanvulling.
            Baie professore ontvang van die kennis uit die onuitputlike Bron, maar dan gebeur dit so dikwels dat so 'n leerkrag uit sy eie 'n ‘wet’ daar stel wat die hele gang van ontwikkeling blokkeer. Daardie blokkering, uit eiewilligheid gebore, word dan in die leerplan opgeneem asof dit 'n groot waarheid verteenwoordig. Tragies dat kaf en korrels nie betyds geskei word nie!
            Een van die grootste blokkerings is die feit dat die voortdurende aanvulling nie eers oorweeg word nie, terwyl dit die sleutel tot die voortbestaan van die heelal is.
            Wiskunde en wetenskap bestaan nie net in die materie nie, maar ook in die geestelike, waar dit net oneindig meer gevorderd is. In die materie bestaan niks wat nie van die geestelike Bron is nie.
            Baie van dit wat geskryf is, is geskryf gedurende ‘n paar jaar, en die aanvulling het nie rusperiodes nie, en my verstaan is beslis ook nie altyd bo verdenking nie!

Posted by at

No comments:

Post a Comment

Subscribe to: Post Comments (Atom)