Voorwoord

Voorwoord (Lees asb eers, indien dit u eerste keer by hierdie blog is, anders kan u gerus met die blad afrol ondertoe om by die blog uit te kom)

Daar het ‘n gedagte in my opgekom toe ek nog redelik jonk was, dat alles wat geskryf of gedruk is nie die volle waarheid is nie. Later het ek besef dat alles wat gelees kan word, bestaan uit kaf en korrels. Nog later het ek besef dat niks in die materie volmaak is nie, daarom kan geen geskrif net uit korrels bestaan nie. Die geskrifte wat jy voor jou het, liewe leser, moet asseblief op dieselfde grondslag beoordeel word. Ek vra jou nie om alles wat jy lees te aanvaar nie, maar soek die korrels volgens jou begrip en gewete uit.
Ongeveer halfpad deur my lewe het ‘n argument, in ‘n baie goeie gees met ‘n goeie vriend van my plaasgevind. Die vriend is ‘n seviele ingenieur en ons het gepraat oor ‘n ontwerp van ‘n staalbalk wat verkry kan word deur ‘n bestaande I balk tandvormig te sny en dan die “tande” op mekaar vas te sweis om ‘n groter balkdiepte en dus ‘n groter dravermoë te verkry.

Fig. 1
‘n Solide I balk word tandgewys gesny en dan word die twee helftes teenoor mekaar geskuif en weer aan mekaar gesweis om weer ‘n dieper I balk te vorm.
Fig. 2
Die vergrote I balk wat meer as 3 keer die dravermoë van die oorspronklike balk sal hê, sonder dat die gewig vermeerder.

Hierdie mag vir die leek ‘n bietjie te tegnies wees, maar wees egter geduldig, ek probeer die verskil in siening verduidelik.
My argument was dat sweislas S nie te kort mag wees nie, want dit sal tot gevolg hê dat die las gaan skuifskeur (shear). Hy het gesê daar is nie daardie soort spanning in die middel van ‘n balk nie. Eintlik was ek met my matriek ‘n bietjie vermetel om met ‘n ingenieur te stry oor iets in sy vakgebied. Ons verskil het gekom omdat ons die voorwerp verskillend gesien het. Hy het Fig. 2 as ‘n eenheid gesien, wat dit werklik was! Daarteenoor het ek dit as twee aparte balke gesien, omdat as sweislas S korter word, beweeg dit nader na 0, wanneer dit werklik twee balke is. Op een of ander lengte van die sweislas sou dit skuifskeur. Die ingenieur het later toegegee dat ek reg was, maar dit is nie van belang nie. Wat ek probeer tuisbring is dat verskillende mense op verskillende maniere na ‘n geskrewe stuk kyk en ek gaan geensins ‘n leser kwalik neem indien hy of sy van my verskil nie.
Dat ek met die geskrifte op mense se tone gaan trap is onvermydelik, maar as dit nie die geval was nie; waarom skryf ek dan? Indien die leser net ‘n paar “korrels” ontdek, is ek verheug en weet ek dat dit die moeite werd was. Sien tog maar die teenstrydighede oor, soos wanneer ek bv. snedigheid veroordeel terwyl ek self dikwels snedige dinge skryf. Ek self is baie ver van volmaak af, sien tog maar die foute oor.
Ook is ek nie ‘n taalkundige nie en daar is beslis baie ruimte vir verbetering, om vloeiende leesgemak te verseker, maar ek vra tog dat verandering versigtig gedoen moet word, aangesien ‘n woord verandering ‘n bedoelde begrip verlore kan laat raak.

Thursday, February 11, 2016

Spesialisasie



Spesialisasie

            Die motor vervaardigings bedryf is vandag een van die suksesvolste ondernemings op aarde. Dit het wel heelwat meer as ‘n eeu geneem om die huidige vlak van doeltreffendheid te bereik, maar daar was sekere ontwikkelings wat die bedryf ‘n hupstoot gegee het. Omdat ek nie oor die nodige kennis beskik nie, gaan ek nie oor die bydrae van die rekenaar tot die suksesverhaal skryf nie, hoewel ek weet dat dit fenominaal is. Wat ‘n baie groot bydrae in die vroeë stadium van die bedryf, tot die sukses bygedra het, is spesialisasie.
            Die eerste motors is individueel met die hand vervaardig en dit het baie probleme veroorsaak en was ontsettend tydrowend. Die eerste geniale ontwerper en vervaardiger was ook nie bereid, om werk aan sy tweede motor te staak, om ‘n onderdeel vir die eerste motor te vervaardig, wanneer dit vervang moes word nie, dus moes ‘n ander persoon gevind word om die onderdeel te vervaardig en hy het waarskynlik nie oor die vaardigheid beskik nie.
            Vermoedelik was dit Henry Ford wat die voordeel van massaproduksie ingesien het en begin het om uitruilbare onderdele te vervaardig. Nou was dit moontlik om een of meer fabriekswerkers te leer om slegs een van die groot verskeidenheid onderdele te vervaardig. Op die manier kon die werker se vermoë ten beste ontwikkel. Minder geniale werkers was in staat gestel om naby volmaakte onderdele te vervaardig. Selfs met die montering van die voertuie is dieselfde beginsel toegepas.
            Die tragedie in Suid Afrika is die skokkende toestand, dat onderwys owerhede nou na meer as 100 jaar, nog nie daardie beginsel begryp nie! Wat uitkomsgerigte onderwys beteken, weet ek nie presies nie, maar dit lyk nie vir my of dit spesialisasie is nie, want ek sien steeds hoe leerlinge op skool, se standaard van onderrig verlaag word, sodat so veel as moontlik in universiteite ingeprop kan word tot die frustrasie van ‘n intelligente rektor, wat moet sukkel met eerstejaars wat nie kan lees of skryf nie!
Universiteitsopleiding is duur en tydrowend, omdat dit gewoonlik ‘n wye veld van opleiding dek. ‘n Ontwikkelende land het vakmanne nou, of so gou as moontlik nodig, nie oor 3 of 5 jaar nie. Die bevolkings aanwas in ag genome, laat ‘n probleem ontstaan dat wanneer die huidige beginners opgelei is, daar weer twee keer soveel beginners opgeneem moet word op ‘n onveranderde basis, wat beteken dat daar twee keer soveel universiteite nodig is! Wie gaan die geboue oprig om nie eers te praat van ander infrastruktuur nie. Die ambagsmanne wat so dringend benodig word, kon met blitskursusse in spesifieke afdelings van ambagte spesialis opleiding gekry het, maar baie sit nou misplaas en worstel met ‘n graadkursus, sonder vooruitsig om die kursus te voltooi, of ‘n waarborg om ‘n betrekking te bekom.
Een manier om balans tussen werksgeleenthede en opleiding te kry, is om slegs studiebeurse goed te keur in die studierigtings waar tekorte voorkom. Dis bemoedigend om te sien dat daar privaat ondernemings is wat blitskursusse aanbied in verskillende ambagte, waar tekorte aan ambagslui voorkom. Die koste van so ‘n kursus is minimaal in vergelyking met ‘n graadkursus en daar kan tien vakmanne opgelei word in die tyd wat dit neem om een gegradueerde op te lei. Die gegradueerde sit na sy opleiding gewoonlik met ‘n massiewe studieskuld wat hy dan moet afbetaal met ‘n kleiner salaris as wat die spesialis opgeleide vakman verdien, wat met ‘n baie klein studieskuld, indien enige, opgesaal is.
Nou het die departement van onderwys se dom-siekte versprei na ander departemente wat met sinnelose wetgewing hulleself in die voet skiet
Hierdie land het ‘n werkloosheidsyfer van 24%. [Volgens onbetroubare syfers deur die regering] Dus moet elke werksgeleentheid soos goud opgepas word. Daar word ‘n wet op die wetboek geplaas dat ‘n persoon net as finansiële raadgewer mag praktiseer as hy ‘n sekere eksamen voor ‘n sekere datum slaag. Blykbaar is die eksamen baie omvattend en dek alle aspekte van finansies. Die praktiserende finansiële raadgewers moet dus ‘n uitgebreide kennis hê oor alle vertakkinge. Die wat die eksamen geslaag het, is minder as die helfte van die 117,000 praktiserende raadgewers. Wanneer die werknemers van die raadgewers in berekening gebring word, wat nou ook hulle werk verloor, sal daar na skatting 100,000 werksgeleenthede verlore gaan. Of die syfers korrek is kan ek nie bevestig nie, dit is uit ‘n bron oor die radio geneem. Persoonlik het ek nooit juis ooghare gehad vir die raadgewers nie, want baie van hulle het raad gegee wat nie so voordelig vir die klieënt was nie, solank hulleself die beste voordeel kon trek.
Die vraag wat ek graag beantwoord wil hê is: Sou dit nie beter gewees het indien die eksamen oor verskillende afdelings van raadgewing gegaan het nie? Almal werk mos nie oor die hele spektrum nie! Indien jy in ‘n sekere rigting spesialiseer is dit mos voldoende om daardie afdeling op die punte van you vingers te ken. Indien ‘n persoon ‘n neiging tot onetiese gedrag het, sal die kennis van die hele spektrum hom eerder tot onetiese optrede aanspoor as om hom tee te hou.
Om 100,000 werksgeleenthede in ‘n riool af te spoel, laat beslis wenkbroue lig! Wat is die motief agter hierdie wet? Skakel dit nie maar net kompetisie uit nie? Indien wel, wat was dit werd? Is hierdie wet nie in stryd met die wet op kartelvorming nie?

12/01/2016, Suid Afrika kan juig, want een amptenaar in die departement van onderwys, het besef dat dit sinneloos is om alle skoliere te probeer gereedmaak vir universitêre opleiding! Daar gaan glo so gou moontlik met ‘n drie-vlak skoolopleiding begin word. Dit is ‘n ligpunt aan die einde van ‘n donker tonnel!     
Na-skoolse opleiding wat oordeelkundig beoefen word, kan regtig ‘n groot behoefte aan werksgeleenthede vul en ek sal graag wil sien of ‘n werkende gegradueerde beginner, die inkomste kan verdien as bv. ‘n loodgieter of ‘n elektrisiën en hierdie beroepe bied ook ‘n baie beter geleentheid vir uitbreiding tot lonende groot ondernemings!



Posted by at

No comments:

Post a Comment

Subscribe to: Post Comments (Atom)