Voorwoord

Voorwoord (Lees asb eers, indien dit u eerste keer by hierdie blog is, anders kan u gerus met die blad afrol ondertoe om by die blog uit te kom)

Daar het ‘n gedagte in my opgekom toe ek nog redelik jonk was, dat alles wat geskryf of gedruk is nie die volle waarheid is nie. Later het ek besef dat alles wat gelees kan word, bestaan uit kaf en korrels. Nog later het ek besef dat niks in die materie volmaak is nie, daarom kan geen geskrif net uit korrels bestaan nie. Die geskrifte wat jy voor jou het, liewe leser, moet asseblief op dieselfde grondslag beoordeel word. Ek vra jou nie om alles wat jy lees te aanvaar nie, maar soek die korrels volgens jou begrip en gewete uit.
Ongeveer halfpad deur my lewe het ‘n argument, in ‘n baie goeie gees met ‘n goeie vriend van my plaasgevind. Die vriend is ‘n seviele ingenieur en ons het gepraat oor ‘n ontwerp van ‘n staalbalk wat verkry kan word deur ‘n bestaande I balk tandvormig te sny en dan die “tande” op mekaar vas te sweis om ‘n groter balkdiepte en dus ‘n groter dravermoë te verkry.

Fig. 1
‘n Solide I balk word tandgewys gesny en dan word die twee helftes teenoor mekaar geskuif en weer aan mekaar gesweis om weer ‘n dieper I balk te vorm.
Fig. 2
Die vergrote I balk wat meer as 3 keer die dravermoë van die oorspronklike balk sal hê, sonder dat die gewig vermeerder.

Hierdie mag vir die leek ‘n bietjie te tegnies wees, maar wees egter geduldig, ek probeer die verskil in siening verduidelik.
My argument was dat sweislas S nie te kort mag wees nie, want dit sal tot gevolg hê dat die las gaan skuifskeur (shear). Hy het gesê daar is nie daardie soort spanning in die middel van ‘n balk nie. Eintlik was ek met my matriek ‘n bietjie vermetel om met ‘n ingenieur te stry oor iets in sy vakgebied. Ons verskil het gekom omdat ons die voorwerp verskillend gesien het. Hy het Fig. 2 as ‘n eenheid gesien, wat dit werklik was! Daarteenoor het ek dit as twee aparte balke gesien, omdat as sweislas S korter word, beweeg dit nader na 0, wanneer dit werklik twee balke is. Op een of ander lengte van die sweislas sou dit skuifskeur. Die ingenieur het later toegegee dat ek reg was, maar dit is nie van belang nie. Wat ek probeer tuisbring is dat verskillende mense op verskillende maniere na ‘n geskrewe stuk kyk en ek gaan geensins ‘n leser kwalik neem indien hy of sy van my verskil nie.
Dat ek met die geskrifte op mense se tone gaan trap is onvermydelik, maar as dit nie die geval was nie; waarom skryf ek dan? Indien die leser net ‘n paar “korrels” ontdek, is ek verheug en weet ek dat dit die moeite werd was. Sien tog maar die teenstrydighede oor, soos wanneer ek bv. snedigheid veroordeel terwyl ek self dikwels snedige dinge skryf. Ek self is baie ver van volmaak af, sien tog maar die foute oor.
Ook is ek nie ‘n taalkundige nie en daar is beslis baie ruimte vir verbetering, om vloeiende leesgemak te verseker, maar ek vra tog dat verandering versigtig gedoen moet word, aangesien ‘n woord verandering ‘n bedoelde begrip verlore kan laat raak.

Thursday, February 11, 2016

Gees en Waarheid



Gees en Waarheid

Kortliks, die Gees lei ons na die Waarheid. Dit is die waarheid, maar eintlik is dit ‘n baie lang pad vir die mens, deur die struikelblokke van die materie.
            In die heelal is daar twee vorme van bestaan. Naamlik die geestelike en die materie. Van ewigheid af is daar net Gees, maar later het gees bygekom en dus was daar toe Gees en gees en sal ons dit die geestelike noem. Wanneer ons soek na Waarheid, moet ons dit soek in die Gees, want die ander gees is die leuen en wil nie die Waarheid verkondig nie.
            Toe die skepping van materie noodsaaklik geword het, om die terugtog van die gevalle geeste moontlik te maak, is daar nog twee ordes gestel wat betrekking het op die materie.
            Die eerste orde is in die geestelike, waarvan ons as materie mense weinig weet. Profete het wel vir ons in sekere opsig die sluier effens gelig, maar as mense is dit ons nie beskore om te veel te weet nie.
            Die tweede orde het betrekking op die materie. Van die hardste stowwe, deur die planteryk tot die diereryk. Dit is die ‘jy moet’ orde waar geen wesens met ‘n vrye wil in leef nie. Alles word beheer deur instink, wat beteken dat alles deur Elohim beheer word.
            Die derde orde is geskep vir die mens, wat van ‘n vrye wil voorsien is; dus volgens die beeld van Elohim geskape en van Sy Gees voorsien. Dit is die orde van ‘geen dwang’ en dit sou gelyk aan die tweede orde wees, as daar dwang sou wees. Onthou selfs Lucifer se volgelinge het ‘n vrye wil.  
            Maar waar is die Gees van Elohim te vinde? Indien jy, as materie-mens die Gees iewers in die heelal moes gaan soek, was dit ‘n onmoontlike taak, daarom het ‘n alwyse Skepper Sy Orde so beplan dat ‘n deeltjie van Sy Gees deur Sy Liefde in jou, as mens met ‘n vrye wil geplaas is. Dit is Sy beeld waarvolgens jy geskape is, deur Sy oneindige genade! Dit bevestig jou verwantskap met Hom! Waar gaan jy nou die Gees soek wat jou na die Waarheid kan lei? In jouself! In “klipgeboue deur mensehande gebou, sal jy Hom nie vind nie”.
            Ons verwys nou na die drieledigheid van die mens, wat bestaan in die derde orde. Dit is die mens wat begunstig is met ‘n vrye wil. Die mens bestaan uit die sintuiglik waarneembare materie. Dan die siel in die geestelike, aan wie die besluitreg gedelegeer is en onsterflik is. Dan die kosbaarste, naamlik die Gees die ewige Liefde Wie sonder dwang jou siel na die Waarheid kan lei – mits die siel dit wil.
Die lang pad na die waarheid. Die orde is die ‘argiteksplan’, dus die Wil van Elohim, daarom is dit in die middel van die sewe eienskappe geplaas. Die vrywillige optrede van die mens se siel begin langs die Orde en vorder stapsgewys tot die volmaaktheid van al sewe eienskappe.

           | Liefde | Wysheid | Wil | Orde | Erns | Geduld | Barmhartigheid |

            Stap een is jou wil om na die Waarheid te soek. Stap twee is die erns waarmee jy na die Waarheid soek. Stap drie is die geduld wat jy beoefen om by die Waarheid uit te kom. Stap vier is die Wysheid waarmee jy beloon word na jou onverpoosde soektog na die Waarheid. Daardie Wysheid rig jou na die Liefde in Gees en materie en Barmhartigheid in die materie, met voortsetting in die gees.
            Na hierdie handeling, wat jy as siel met ‘n vrye wil suksesvol deurloop het, word jy ‘n ‘werktuig’. Sonder ‘n vrye wil? Is jou vrye wil van jou weggeneem? O nee! Jy het oneindig gewen! Jou siel het volmaak ryp geword en verenig met die Gees wat jou lewenslank vergesel het. Jy het deur die verwerfde Wysheid die Waarheid ontdek van Elohim se volmaakte Orde. Niks kan jou ooit weer skei van die Wil van jou Skepper nie. Sy Wil is Jou Wil omdat Jy Is wat Jy Was. Terug in die Vaderhuis. Een met Hom, gereed om nuwe skeppings voort te bring.

18/1/2012 Ontdek in Die Nuwe Openbaring van Johannes Boek 1:109
            Jy is ‘n mens, met ‘n vrye wil, wat ‘n werktuig hanteer [soos jy wil]. Wanneer word jy ‘n ‘werktuig’, oënskynlik sonder ‘n vrye wil? Wanneer jou siel [jy] geestelik volmaak ryp is en jou wil Sy Wil is! Wanneer die Wysheid waarvan jy nou deel is, dit onmoontlik maak om enigiets anders as Sy Wil te wil doen. Jy het dan jou doel bereik. Eenwording met Elohim. Gedurende die proses van ‘werktuig word’ is jy nie verlaag nie, want jou vrye wil is nie van jou af weggeneem nie. Jou wil het net volmaak geword soos die van die Vader! ‘n Eenheid het nie twee wille nie.
Posted by at

No comments:

Post a Comment

Subscribe to: Post Comments (Atom)