Ashope

Ashope

            Vyf en sewentig jaar gelede het ek bewus geword van ashope. Dit was ‘n terrein waar alles wat nie in ‘n woonhuis geduld was nie, op ‘n hoop gegooi was. Toentertyd se ashope was klein en het nie ‘n groot verskeidenheid artikels bevat nie. Nie alles wat daar gegooi is was heeltemal onbruikbaar nie, want ek onthou dat die as gebruik was om die kastrolle blink te skuur. Daardie ashope was gewoonlik nie baie vêr van die woonhuise af nie, maar op ‘n redelik onopvallende terrein.

            Deesdae kan ons nie meer praat van ‘n ashoop nie, want as is ‘n onbeduidende deel van dit wat weggegooi word. Kom ons noem dit ‘n rommelhoop. Soos wat die verbruikers goedere vermeerder het, het die rommel ook vermeerder en die terrein van storting het ‘n groot probleem geword. Die ashoop en die rommelhoop het tog iets in gemeen: Eerstens is daar op elkeen sekere voorwerpe wat wel gebruik kan word, of hersirkuleer kan word. Die belangrikste ooreenkoms is egter dat goed wat nie bymekaar hoort nie, bymekaar gegooi word! Dit is besoedelend en dit maak nie saak wat dit is nie, as dit verskillend is, is die uiteinde ‘n rommelhoop.

            Kom ons kyk nou na die boek “Going Deeper”. Daarin word kosbare waarhede gevind, maar daar is ook groot gedeeltes wat geweldig misleidend is. Die grootste probleem is dat die skrywer studies van alle ‘godsdienste’ op aarde gemaak het en dit deurmekaar geroer het en as die groot ‘waarheid’ verkondig. Wat hy in werklikheid doen, is om ‘n rommelhoop van die hemel te maak. Sekere dele van die boek is werklik ‘n belaglike voorstelling van die Skepper!

             Die skrywer se begrip van ‘ewigheid’ is verstommend. ‘Ewigheid’ beteken tog dat daar geen begin was nie. Die Fibonacci volgorde is so ‘n goeie demonstrasie van die begin van materie, waar die begin baie duidelik onvolmaak is, maar geleidelik meer volmaak word. Nou wil die skrywer van die boek probeer om ‘n begin aan die Godheid te koppel. Hy maak selfs ‘n lasterlike bewering dat die Godheid ‘eksperimente’ moes maak om te sien hoe die materie sou uitdraai! ‘n Totale ontkenning van die alwetendheid van die volmaakte Skepper! Die skrywer het duidelik nie die vaagste benul waarom materie geskep is nie. In geheel gesien is die boek daarop gemik om die lesers te mislei, want die boek is tot oorlopens toe vol van paradokse wat hy op onsinnige wyse aanvaarbaar probeer maak. Tog is daar seker baie mense wat sy stories sal glo.

           

            Sien die geskrif  “Die doel agter die skepping van materie”