Na afsterwe

Na afsterwe ?     

            Is die mens vol vrees vir die onbekende wat wag na die dood, of sien die mens verlangend uit na dit wat wag? Dan is daar die wat onseker is en dan die wat onbekommerd is, omdat hulle nie aan die geestelike glo nie.

            Die laaste groep kan herken word aan hulle optrede voor die dood, want hulle is net daarop ingestel om soveel aardse skatte bymekaar te maak as wat moontlik is. Moontlik wag daar ‘n verrassing, maar dit is nie my saak nie.

            Wat die aanleiding tot die onsekerheid is, is waarskynlik onvermoë om te onderskei tussen reg en verkeerd, want dit hang tot ‘n groot mate af wie of wat geglo word. Ook is die onwilligheid om liggaamlike genietinge te weerstaan ‘n bydraende faktor, want gewoonlik word daarvoor doelbewus ‘n verskoning gesoek, al waarsku die gewete!

            Die groep wat verlangend uitsien na die lewe van die siel na die afsterwe van die materie liggaam, is juis dié wat bekommerd behoort te wees, omdat hulle moontlik ‘n baie groot ontnugtering gaan kry! Hierdie mense sit gewoonlik in volgepakte kerkgeboue en luister na die woorde van ‘n prediker wat sê dat elkeen van hulle reguit hemel toe gaan, want “Jesus het reeds vir hulle sondes aan die kruis gesterf”. Pasop dat daardie woorde van die prediker nie net bedoel is om soveel moontlik lidmate in sy kerk te kry nie. Daardie preke is dikwels die rede waarom mense wat swaarkry, selfmoord pleeg om die ellende vir die heerlikheid te verruil! Wie is nou verantwoordelik vir ‘n daad wat soveel droefheid tot gevolg het? Jesus het beslis vir baie se sondes gesterf, maar beslis nie sonder berou van die skuldenaar nie! Die lewe op aarde is die geleentheid wat elke siel kry om te strewe na volmaaktheid, maar daardie volmaaktheid is in werklikheid byna onmoontlik om te bereik en slegs enkeles het dit bereik. Daardie siele het opgevaar na die hemel en is sekerlik deur die poort ingelaat. Wat nou van die ander ‘goeie’ mense? Hulle, en selfs die ‘minder goeies’ sal ook deur die poort gaan, want ons hemelse Vader is genadig en Sy liefde vir Sy kinders strek tot in ewigheid, maar daardie toelating kan baie lank duur!

            Die wat vol vrees die dood tegemoet gaan, kan ook onder die getel word wat deur die groot genade van ons Vader gered sal word. Die aarde is geskep om as rehabilitasiesentrum vir die sondige siele te dien. Die geestelike groei kan gedurende die lewe op aarde baie vinniger plaasvind as in die geestelike hiernamaals, maar dit wat nie bereik word in die materie nie, sal in die geestelike voortgesit kan word, indien dit die begeerte van die siel is, want elke siel het ‘n vrye wil.  

            Henog, die sewende in die geslag van Adam het wel toegang tot die hemel gehad en ons kan heelwat leer uit sy geskrifte. Henog kon die toekoms sien met verstommende akkuraatheid. Omdat hy die Skepper kon sien is die bewys dat hy hom in die geestelike bevind het en die tonele wat hy gesien het, behoort ook vir die siele van gestorwe mense op soortgelyke wyse sigbaar te wees. Geestelike wesens is nie soos mense van twee geslagte nie, want vermeerdering kan deur middel van verdeling plaasvind, maar alleen indien dit die wil van Elohim is. Wanneer ‘n mens te sterwe kom verander die siel nie in ‘n ‘engel’ nie, maar bly oënskynlik van dieselfde geslag en behou dieselfde neigings en gedragspatrone, op die vlak van die laaste dae as materie mens. Eers wil ek vertel wat ‘n paar jaar gelede oor televisie uitgesaai is. ‘n Sekere vrou was deel van ‘n program, oor wat die optrede van ‘n siel of gees na die afsterwe van ‘n mens is. Sy kon met die siele of ‘geeste’ van oorlede persone kontak maak en gesprek voer. Die familie van die meeste gestorwenes het bevestig dat die kontak eg moes wees, omdat selfs die beskrywing van meubels korrek was. Sy het beweer dat die siele bly rondbeweeg het waar hulle gewoond was om as lewendes te beweeg. Wat vir my opvallend was, is dat sy soms nie kontak kon maak nie, omdat die siel reeds volgens haar ‘deurbeweeg’ het. Omdat ek nooit ‘n geleentheid gehad het om met haar te praat nie, weet ek nie waarheen die siel beweeg het nie, en waarom.

            Met die lees van Jesus se diktaat, soos gegee aan Jakob Lorber, kan ‘n duidelike beeld gevorm word van wat die siel van ‘n gestorwe mens sal waarneem wanneer die ‘gebied’ van die geeste betree word. Kom ons kyk vlugtig daarna. Dit word aangehaal uit “Van die Hel tot die Hemel” maar wanneer ek aanhaal, gaan ek dit net verkort tot  H-H. Uit die voorwoord: “Onder die nuwe openbaringe is ook boeke wat toestande beskrywe waarin die mens homself bevind na sy dood en die sfere van die steeds verder gaande ontwikkeling in die hiernamaals”.

            Robert het byna 200 jaar gelede ‘n stryd gevoer teen ‘n onbillike regering en is na sy inhegtenisneming deur ‘n vuurpeloton tereggestel, omdat hy as terroris beskou was. Sy geskiedenis as geestelike wese, gee ‘n aanduiding van wat om te verwag na afsterwe, maar dit kan heelwat verskil van die gestorwene met ‘n meer gewone lewensloop. Ons sal dus maar begin waar die lig die duisternis vervang en die periode in die hel ignoreer.

            H-H 24:2 “En HY lei die mense onder alle omstandighede van hulle lewe, wat ‘n oefenskool is, so, dat byna almal, ondanks alle moeilikhede, die hoë bestemming moet bereik, terwille waarvan die Godheid hom enkel en alleen in die lewe geroep het”.

            H-H 28:4 “Maar God laat dit nooit na om hulle op die beste weg na hulle tuiste en mees volmaakte doel te lei nie. Hoe kan jy dink dat die Godheid Haar skepsele, wat Sy uit Haarself voortgebring het, vir ewig sal vervloek en sou verdoem!” [Gaan dit hier oor Adamiete?].

            H-H 32:2,3 “Kyk, jy is nou ook soos ‘n nie volryp druif en jy is nog nie vir die onthulling wat jy verlang, ryp nie. En waarom nie? Dit wat nou volg, sal dit wel vir jou aantoon! Wanneer jy egter ryp word, dan sal jou eie gees jou sê wat jy nou regstreeks van MY sou wil hoor. Ons het nog eers ‘n belangrike kapittel [onderwerp] met mekaar te bespreek. As dit goed verloop, dan sal jy vinniger ryp word as wat jy jou kan indink. Val die bespreking nie uit volgens God se orde nie, dan sal jy nog ‘n hele tyd nodig hê vóór jy volkome ryp sal wees”. [Die tempo van ontwikkeling word dus bepaal deur die siel, wat ‘n vrye wil het.]

            H-H 36:11 Robert se siel is aan die woord: “Kyk, seer gewaardeerde vriend [Jesus], en God in alles wat jy ten opsigte van my wil wees: Ek kan my weliswaar nie oor my teenswoordige toestand bekla nie. Ek is nie dorstig of hongerig nie; my hele wese word deur geen pyn gepla nie en aan jou geselskap het ek genoeg vir die hele ewigheid [kan vir ewig aanhou]. Maar as ons vir ons wedersydse debatte ‘n beter plekkie sou kon vind, sou dit werklik nie sleg wees nie. Want hier sien dit ‘n bietjie yl uit, ja, jy sou self kan sê dat dit op heeltemal niks lyk nie. Behalwe die klein bergie waarop ons nou al ‘n geruime tyd saam op staan, is daar geen enkele wese te sien nie. Kon ons maar ‘n grasveldjie, met byvoorbeeld ‘n eenvoudige landshuisie ontdek en in besit neem, dan sou ons uiters interessante debatte in ‘n veel beter sfeer kon vervolg!” [Op hierdie tydstip het Robert se siel nognie besef dat sy metgesel Jesus Self was nie]

            H-H 37:1 “EK sê: Beste vriend en broer! Dit is nou haas nie moontlik nie. Hier in die wêreld van die geeste kan alleen dit in werklikheid sigbaar word wat ‘n mensesiel in haar hart saam hierheen gebring het. In die hele oneindigheid bestaan daar maar één enkele werksame middel om die doel te bereik, en dit heet deemoed van die hart, in die totale betekenis van die woord!”

            H-H 39:2,7,10 “Jy moet net dit wat EK aan jou gaan bekendstel, noukeurig volgens MY voorskrifte opneem en daarvolgens handel met jou hart, dan sal jy skielik helder begin sien. En jy sal oor die wese van baie dinge, waaroor jy nou nog in die duister verkeer, helderheid en duidelikheid verkry. Want Ekself neem die verstand van die hart uit My Gees en lê dit soos ‘n goeie saaier in die bodem van die hart; dit is die egte liefde, wat deur deemoed en sagmoedigheid baie goed gevoed word. Dit is dus vanselfsprekend dat die uiterlike verstand moet afneem, ja, uiteindelik gevange geneem en onthoof moet word, wanneer die ware verstand van die hart, wat gelyk is aan Myself, in iedere mens toeneem en uitgroei tot die heerlikste boom van die lewe, waarin volkome kennis lê”.

            H-H 40:1,4-9 “EK sê: Beste broer en vriend! EK sê vir jou, jou sonde is jou vergewe, omdat jy jou so verdeemoedig het dat jy die waarde van jou uiterlike verstand totaal opgegee en in plaas daarvan die verstand van jou hart aangeneem het. Daarom sal al jou aardse gebreke van nou af nie meer ter sprake kom nie! Maar die insig is nog lank nie genoeg nie. Jy moet om die ware hemelryk te verkry, die insig ook verlewindig met die ware liefde tot die naaste en daardeur met alle liefde tot MY! Daarom sal EK jou na ‘n plek bring waar dit jou beslis nie aan gevarieerde geselskap sal ontbreek nie. Jy sal ‘n aansienlike stuk grond kry, met ‘n groot en goed toegeruste woonhuis, en wel aan ‘n hoofweg in ‘n baie bekoorlike omgewing. [Ons moet onthou wat Jesus tevore aan Robert gesê het dat slegs dit “sigbaar word wat ‘n mensesiel in haar hart saam hierheen gebring het”.] Ook sal daarvoor gesorg word vir ‘n aansienlike personeel staf, wat jou op jou geringste wenk sal gehoorsaam.

            Baie reisigers sal van die aarde af hier in die geestelike wêreld verbykom en by jou huis verbytrek en ook hier by jou aanklop. Daar sal vriende en vyande by wees. Maar sorg daarvoor, dat jy almal met opregte liefde ontvang en hulle gee wat hulle nodig het, omdat hulle almal MY kinders, en dus ook jou broers en susters is. [Adamiete?] Dan sal jy al die veelvoudige verkeerde dinge weer goedmaak, wat jy op aarde weliswaar nie deur jou wil nie, maar alleen deur jou geestelike onverstand bederwe het. Ekself sal dan weer na jou toe kom en vir jou sê: Omdat jy hierdie klein huishouding goed beheer het, sal jy nou voor ‘n groter taak gestel word!

            Neem jou bowenal in ag vir woede en wraaksug, asook vir onsuiwer liefde, waarvoor dit jou nie aan geleenthede sal ontbreek nie. Dan sal jou nuwe lewensopgawe sekerlik binnekort volbring wees en jou ware, ewige lewensgeluk sal vanaf daardie oomblik werklik begin straal.

            Wees ook op jou hoede vir nuuskierigheid! Want dit maak geen enkele gees beter en ligter nie, maar maklik slegter en meer duister. As jou kragte jou tekort skiet, dra dan alles aan MY op, en jy sal spoedig voldoende hulp kry.

            Nou weet jy alles. Sê MY daarom nou, of jy met MY voorstel tevrede is? Waarna ons onsself onmiddelik op die bepaalde plek sal bevind!”

            H-H 41:1 “Robert sê: O, Heer, U is nou vir ewig my enigste liefde! Vers 8 “Kyk, MY beste Robert, al jou sonde is jou vergewe, en EK het jou onbeskryflik lief, omdat jy MY nou ook begin liefhê!”

            H-H 44:3 “Dit sal jou belangrikste taak word om al hierdie radikales op dieselfde weg te bring as waarop EK jou nou gebring het”. [Die ‘radikales’ was mede terroriste.]

           

            Hoeveel van die ‘gelowiges’ op aarde verkeer in ‘n voortdurende staat van spanning, omdat daar ‘n onsekerheid oor die lewe na die aardse dood is? Wie moet geglo word, want daar bestaan heelwat verskillende idees oor die saak? Die maklikste uitweg is natuurlik om te glo dat jou siel regstreeks uit jou liggaam in die hemel in gaan! Daarom sal jy ook graag na die preke luister wat dit verkondig! Maar wat nou as jy lees dat niks onrein in die hemel toegelaat sal word nie? Daarom is Lucifer en sy volgelinge uit die hemel gewerp! Dit is tog heel sinvol, want hoe sal die hemel lyk nadat al die besoedeling van die aarde af dit oorstroom het?

            ‘n Mens kan oor jou eie hiernamaals bekommerd wees, maar dit is darem gerusstellend dat jy nog altyd die geleentheid het om te verbeter. Moontlik is die kommer oor ‘n geliefde familielid wat reeds oorlede is, die grootste bron van kommer, want hoor hoe dreig sommige kerke met die hel! Die vorige drie bladsye bestaan uit gedeeltes wat hoofsaaklik geneem is uit wat Jesus self gedikteer het, en dit gee ‘n aanduiding van wat gebeur met die siel van ‘n oorlede mens.

            Eerstens is dit baie duidelik dat die Liefde, genade en geduld van Jesus oneindig is! Hy het ruim voorsiening gemaak dat ‘n siel, wat die liggaam verlaat het, dan nog tot ware berou kan kom en dan so volledig bekeerd kan wees dat die hemel betree sal word! In die geestelike kry die siel ‘n tweede kans, maar dit duur in mensejare gemeet, veel langer as op aarde.

            Jesus sê vir Robert dat hy moet waak teen woede en wraaksug, asook teen onsuiwer liefde, want die geleenthede daartoe sal nie ontbreek nie. Dit kom eienaardig voor dat hy gewaarsku word om nie onsuiwer seks te beoefen nie!

            H-H 67 NB [Met betrekking tot siele in die na-doodse ryk.] “Dat hierdie toneel hier heeltemal letterlik weergegee word soos wat dit werklik in die geesteswêreld afspeel, dat gewoontes, spraak, hartstogte en die verskillende grade van ontwikkeling van ‘n volk noodsaaklik met hulle saambring, gebeur om die gelowige leser en aanhanger van hierdie openbaring ‘n aanskoulike bewys te gee, dat die mens na die aflegging van sy liggaam, net so ‘n mens is met huid en haar, met sy manier van spreek, met sy opvattings, gewoontes, sedes, gebruike, neigings, hartstogte en die daaruitvloeiende manier van handel, as toe hy op aarde was tydens sy lewe in sy liggaam, dit wil sê, solank hy nog nie die volledige wedergeboorte van die gees bereik het nie. Daarom heet so ’n eerste toestand direk na die oorgang die “natuurlik-geestelike toestand” terwyl ‘n volledige, volkome wedergebore gees hom in die “suiwer geestelike toestand” bevind, wat toegang tot die suiwer hemel toelaat”.

             Die siel wat die gestorwe menslike liggaam verlaat, kan as gevolg van onsuiwerheid nie die suiwer hemel betree nie. Die siel bevind hom of haar in ‘n gebied waar daar geen werklike waarneembare verandering aan hulle self plaasgevind het nie. Hoewel hulle in die geestelike is, bly ‘n man ‘n man en ‘n vrou bly ‘n vrou; die kleredrag bly diesefde en indien benodig word soos op aarde klere aangetrek. Hulle behou selfs die simptome van aansteeklike siektes waaraan hulle op aarde gely het. Hulle kan dieselfde bedrywighede beoefen waaraan hulle gewoond was! Is dit waar die ongeregtigheid “van die huise se dakke af verkondig gaan word”? Want die boosheid is ten aanskoue van almal! Dit wil voorkom asof dit ‘n ‘grys’ gebied is tussen materie en gees. Hierdie ‘gebied’ bewys die onbeskryflike Liefde en Lankmoedigheid wat ons hemelse Vader vir Sy kinders het, deur ons ‘n tweede geleentheid te verleen; want anders sou daar net twee bestemmings kon wees – of die hemel of die hel! Ons het steeds ‘n vrye wil, maar Jesus is elke oomblik beskikbaar indien ons hulp benodig!