Voorwoord

Voorwoord (Lees asb eers, indien dit u eerste keer by hierdie blog is, anders kan u gerus met die blad afrol ondertoe om by die blog uit te kom)

Daar het ‘n gedagte in my opgekom toe ek nog redelik jonk was, dat alles wat geskryf of gedruk is nie die volle waarheid is nie. Later het ek besef dat alles wat gelees kan word, bestaan uit kaf en korrels. Nog later het ek besef dat niks in die materie volmaak is nie, daarom kan geen geskrif net uit korrels bestaan nie. Die geskrifte wat jy voor jou het, liewe leser, moet asseblief op dieselfde grondslag beoordeel word. Ek vra jou nie om alles wat jy lees te aanvaar nie, maar soek die korrels volgens jou begrip en gewete uit.
Ongeveer halfpad deur my lewe het ‘n argument, in ‘n baie goeie gees met ‘n goeie vriend van my plaasgevind. Die vriend is ‘n seviele ingenieur en ons het gepraat oor ‘n ontwerp van ‘n staalbalk wat verkry kan word deur ‘n bestaande I balk tandvormig te sny en dan die “tande” op mekaar vas te sweis om ‘n groter balkdiepte en dus ‘n groter dravermoë te verkry.

Fig. 1
‘n Solide I balk word tandgewys gesny en dan word die twee helftes teenoor mekaar geskuif en weer aan mekaar gesweis om weer ‘n dieper I balk te vorm.
Fig. 2
Die vergrote I balk wat meer as 3 keer die dravermoë van die oorspronklike balk sal hê, sonder dat die gewig vermeerder.

Hierdie mag vir die leek ‘n bietjie te tegnies wees, maar wees egter geduldig, ek probeer die verskil in siening verduidelik.
My argument was dat sweislas S nie te kort mag wees nie, want dit sal tot gevolg hê dat die las gaan skuifskeur (shear). Hy het gesê daar is nie daardie soort spanning in die middel van ‘n balk nie. Eintlik was ek met my matriek ‘n bietjie vermetel om met ‘n ingenieur te stry oor iets in sy vakgebied. Ons verskil het gekom omdat ons die voorwerp verskillend gesien het. Hy het Fig. 2 as ‘n eenheid gesien, wat dit werklik was! Daarteenoor het ek dit as twee aparte balke gesien, omdat as sweislas S korter word, beweeg dit nader na 0, wanneer dit werklik twee balke is. Op een of ander lengte van die sweislas sou dit skuifskeur. Die ingenieur het later toegegee dat ek reg was, maar dit is nie van belang nie. Wat ek probeer tuisbring is dat verskillende mense op verskillende maniere na ‘n geskrewe stuk kyk en ek gaan geensins ‘n leser kwalik neem indien hy of sy van my verskil nie.
Dat ek met die geskrifte op mense se tone gaan trap is onvermydelik, maar as dit nie die geval was nie; waarom skryf ek dan? Indien die leser net ‘n paar “korrels” ontdek, is ek verheug en weet ek dat dit die moeite werd was. Sien tog maar die teenstrydighede oor, soos wanneer ek bv. snedigheid veroordeel terwyl ek self dikwels snedige dinge skryf. Ek self is baie ver van volmaak af, sien tog maar die foute oor.
Ook is ek nie ‘n taalkundige nie en daar is beslis baie ruimte vir verbetering, om vloeiende leesgemak te verseker, maar ek vra tog dat verandering versigtig gedoen moet word, aangesien ‘n woord verandering ‘n bedoelde begrip verlore kan laat raak.

Thursday, February 11, 2016

Die Blou Glasie



Die Blou Glasie

            Die blou glasie word beskryf in ‘n ander geskrif, maar ek gaan dit tog herhaal omdat nie almal die ander geskrif gelees het nie.
            ‘n Klompie jare gelede het ek ontdek hoe die verhouding tussen die materie, siel en Gees is en wat elkeen se funksie is. Die liggaam dra die siel en Gees deur die materie. Die siel is met ‘n vrye wil toegerus en het beheer oor die doen en late van die liggaam. Die Gees is ‘n liefdesgawe uit die hand van Elohim, om die siel met goeie raad te voorsien.
             Voor my het ek drie glasies gesien. Die middelste glasie was geel met die woord ‘SIEL’ daarop. Aan sy linkerkant was ‘n rooi glasie met die woord ‘LIGGAAM’ daarop. Aan die regterkant van die geel glasie was ‘n blou glasie met die woord ‘GEES’ daarop. Vanaf die geel glasie het ‘n duidelike pyl in die rigting van die rooi glasie gewys en nog ‘n duidelike pyl het in die rigting van die blou glasie gewys. Die boodskap was baie duidelik. Ek as lewende siel met ‘n vrye wil, het die keuse om te kies wie ek wil aanhang, die liggaam [materie] of die Gees. Wil die ‘geel glasie’ na die ‘rooi glasie’ toe beweeg of na die ‘blou glasie’ toe?
            Die siel, met sy vrye wil, neem die besluite. Wanneer die liggaam ‘n behoefte het, word ‘n baie duidelike sein na die brein gestuur, maar die siel sal besluit of aan die behoefte voldoen moet word; as die behoefte bv. honger of dors is, sal die siel geredelik toestem dat aan die behoefte voldoen kan word. Omdat die siel weet dat die liggaam die draer van liggaam, siel en Gees is, sal die siel, afhangend van sy ingesteldheid, besluit om toestemming te gee of nie. Vanselfsprekend sal die siel alle redelike versoeke goedkeur. Die seine van liggaamlike behoeftes is baie duidelik en kan soms dringend wees! Die siel mag wel ‘n ‘klokkie’ hoor wanneer sekere besluite geneem moet word, maar die duidelikheid hang af hoe naby die siel aan die Gees [‘die blou glasie’] lewe.
            Die geskiedenis is eintlik baie belangrik, want as ons dit ken het ons ‘n bron waaruit ons baie kan leer. Daar is ‘n gesegde wat lui: “Die geskiedenis leer dat niemand uit die geskiedenis leer nie”. Dit is alleenlik waar as ons niks uit die geskiedenis wil leer nie. Om te bid is om erkenning te gee aan ons Skepper, en ons moet bid, maar ons moet begryp dat daardie gebed, hoe onvolmaak ookal, is tog toenadering tot ‘n barmhartige Elohim wat in Sy groot liefde ons nie sal verwerp nie. Dit op sigself is groei. Wanneer iemand alleen op ‘n eensame plek is en hy wonder hoe hy nader aan die ‘blou glasie’ kan beweeg, is dit nie nodig om bekommerd te wees nie, want die woord sê dat jy Hom nie in klipgeboue, deur mensehande gebou, sal vind nie. Dit is binne in jouself. Die ‘Blou Glasie’ is binne in jouself! Soos reeds vermeld is jou liggaam  materie, maar in daardie liggaam dra jy ‘n onsterflike siel, wat gees is. Die derde komponent is die grootste geskenk ooit, naamlik die Gees van Elohim. Dit is gevestig naby jou hart. Dit is die ‘blou glasie’ en daardie ‘Blou Glasie’ is elke sekonde van jou lewe beskikbaar om jou siel te bedien met liefdevolle raad, maar nooit te dwing nie. Hoe nader jou siel aan die ‘Blou Glasie’ beweeg hoe vinniger is die groei. Wanneer die ‘geel glasie’ [siel] uit vrye wil, volledig oor die ‘Blou Glasie’ beweeg, is die pad na volmaaktheid voltooi, maar dit kan eintlik nie in die materie gebeur nie, [slegs enkele gevalle bekend] dan skei die siel, wat verenig is met die Gees, van die liggaam en beweeg na die ‘ander kant’. Wanneer die siel by aflegging van die liggaam net gedeeltelik met die Gees verbind is, sal die verdere groei of veredeling in die geestelike plaasvind. Dit is die gewone weg van ‘n geredde siel
            ‘n Prisma van glas word gebruik om wit lig te verdeel in sewe kleure [Eienaardig dat elkeen van die sewe kleure donkerder vertoon as die wit lig]. Wanneer die kleure deur die prisma teruggevoer word en een kleur is afwesig, sal daar nie wit lig aan die ander kant wees nie.
            Die sewe kleure van die reënboog kan vergelyk word met die sewe geeste of eienskappe wat nagestreef moet word tot kindskap van Elohim.
            Rooi        Oranje        Geel          Groen     Blou     Indigo     Violet
            Liefde      Wysheid     Wil             Orde      Erns     Geduld    Barmhartigheid
            In die middel vind ons die Orde. Die volmaakte Skepper het ‘n volmaakte Orde geskep wat dien as riglyn vir die heelal, soos wat ‘n argitek ‘n volledige plan teken voordat ‘n huis gebou word. Niks wat in die heelal bestaan is toeval nie, alles het ontstaan volgens die volmaakte beplanning van die Skepper se Orde. Ons as skepsels, met ‘n vrye wil, kan lewe volgens of teen die Orde.
            Langs die Orde vind ons die Wil. Die Wil is noodsaaklik indien ons besluit om volgens die volmaakte Orde te leef op soek na die ‘Blou Glasie’.
            Aan die ander kant van die Orde vind ons die Erns. ‘n Wil sonder erns is maar net so goed as willoos. Erns is dus ‘n noodsaaklike skakel in die soeke na die Orde of groei van die siel; die beweeg na die ‘Blou Glasie’.
            Verder aan vind ons die Geduld. Sonder geduld kan ons nie verder vorder nie, aangesien die volgende stap jare neem om te bemeester.
            Hierdie stap is die Wysheid. Mense verstaan nie altyd wat wysheid is nie, omdat hulle dit verwar met geleerdheid of intelligensie. Intelligensie is oorerflik en ‘n redelike mate van geleerdheid kan binne ‘n paar jaar bereik word. Wysheid is nie so maklik om ‘aan te leer’ nie, want die ‘resep’ word deur die slimmes verberg, deurdat hulle nie aan die bestaan van ‘n Skepper glo nie. Dit het my jare geneem om te ontdek dat Wysheid is om die wil van Elohim te doen. Dit is die weg na die ‘Blou Glasie’.
            Wanneer die vyfde stap of eienskap bemeester is, lei dit jou na die sesde en sewende eienskappe. Hierdie twee stappe of eienskappe is eintlik onafskeidbaar, want die een kan nie sonder die ander bestaan nie. Die Liefde tot Elohim kan in jou hart bestaan, maar Hy is Gees en jy is materie en die enigste manier om jou liefde te bewys is om Barmhartigheid in die materie aan jou naaste te bewys. Wanneer al sewe eienskappe volledig deur jou opgeneem is, dan het jy deel van die ‘Blou Glasie’ geword!
            Net soos al sewe kleure nodig is om wit lig te kry, is al sewe eienskappe van Elohim nodig om by die ‘Blou Glasie’ uit te kom. Jy moet die Wil hê om met alle Erns die Orde van Elohim na te streef, dan met Geduld die Wysheid soek, wat jou sal lei na Liefde en Barmhartigheid, die groot gebod.            
           
           
           
           
           
                                                           
Posted by at

No comments:

Post a Comment

Subscribe to: Post Comments (Atom)