Voorwoord

Voorwoord (Lees asb eers, indien dit u eerste keer by hierdie blog is, anders kan u gerus met die blad afrol ondertoe om by die blog uit te kom)

Daar het ‘n gedagte in my opgekom toe ek nog redelik jonk was, dat alles wat geskryf of gedruk is nie die volle waarheid is nie. Later het ek besef dat alles wat gelees kan word, bestaan uit kaf en korrels. Nog later het ek besef dat niks in die materie volmaak is nie, daarom kan geen geskrif net uit korrels bestaan nie. Die geskrifte wat jy voor jou het, liewe leser, moet asseblief op dieselfde grondslag beoordeel word. Ek vra jou nie om alles wat jy lees te aanvaar nie, maar soek die korrels volgens jou begrip en gewete uit.
Ongeveer halfpad deur my lewe het ‘n argument, in ‘n baie goeie gees met ‘n goeie vriend van my plaasgevind. Die vriend is ‘n seviele ingenieur en ons het gepraat oor ‘n ontwerp van ‘n staalbalk wat verkry kan word deur ‘n bestaande I balk tandvormig te sny en dan die “tande” op mekaar vas te sweis om ‘n groter balkdiepte en dus ‘n groter dravermoë te verkry.

Fig. 1
‘n Solide I balk word tandgewys gesny en dan word die twee helftes teenoor mekaar geskuif en weer aan mekaar gesweis om weer ‘n dieper I balk te vorm.
Fig. 2
Die vergrote I balk wat meer as 3 keer die dravermoë van die oorspronklike balk sal hê, sonder dat die gewig vermeerder.

Hierdie mag vir die leek ‘n bietjie te tegnies wees, maar wees egter geduldig, ek probeer die verskil in siening verduidelik.
My argument was dat sweislas S nie te kort mag wees nie, want dit sal tot gevolg hê dat die las gaan skuifskeur (shear). Hy het gesê daar is nie daardie soort spanning in die middel van ‘n balk nie. Eintlik was ek met my matriek ‘n bietjie vermetel om met ‘n ingenieur te stry oor iets in sy vakgebied. Ons verskil het gekom omdat ons die voorwerp verskillend gesien het. Hy het Fig. 2 as ‘n eenheid gesien, wat dit werklik was! Daarteenoor het ek dit as twee aparte balke gesien, omdat as sweislas S korter word, beweeg dit nader na 0, wanneer dit werklik twee balke is. Op een of ander lengte van die sweislas sou dit skuifskeur. Die ingenieur het later toegegee dat ek reg was, maar dit is nie van belang nie. Wat ek probeer tuisbring is dat verskillende mense op verskillende maniere na ‘n geskrewe stuk kyk en ek gaan geensins ‘n leser kwalik neem indien hy of sy van my verskil nie.
Dat ek met die geskrifte op mense se tone gaan trap is onvermydelik, maar as dit nie die geval was nie; waarom skryf ek dan? Indien die leser net ‘n paar “korrels” ontdek, is ek verheug en weet ek dat dit die moeite werd was. Sien tog maar die teenstrydighede oor, soos wanneer ek bv. snedigheid veroordeel terwyl ek self dikwels snedige dinge skryf. Ek self is baie ver van volmaak af, sien tog maar die foute oor.
Ook is ek nie ‘n taalkundige nie en daar is beslis baie ruimte vir verbetering, om vloeiende leesgemak te verseker, maar ek vra tog dat verandering versigtig gedoen moet word, aangesien ‘n woord verandering ‘n bedoelde begrip verlore kan laat raak.

Thursday, February 11, 2016

Die twee seuntjies



 Die twee seuntjies

            Die lig-seuntjie is geweldig trots op sy pa wat die dimensie-kampioen vir spoed is. Hy spog teenoor die seuntjie van die vrye Gees soos volg: "My pa beweeg teen 300'000 kilometer per sekonde. Hy is die kampioen!"
            Die vrye Gees Seuntjie kyk hom liefdevol simpatiek aan en sê: "My Pa beweeg teen 300'000 ligjare in een driehonderdduisendste van 'n sekonde. Hy het nie nodig om as kampioen gekroon te word nie."
            Die lig-seuntjie praat vanuit die materie. Sy pa is werklik 'n kampioen, want lig is volgens ons wete, tot die hoogste snelheid in die materie in staat. Wat die lig-seuntjie blykbaar nie weet nie, is dat hy praat vanuit die ingeperkte materie, wat op sy beste besoedel is. Selfs die outjie se hoogmoed is 'n kenmerk van die materie. Hy laat my dink aan 'n blonde klein grootbek, wat in sy dwaasheid dink hy is so wonderlik, dat hy die Godheid kan oorneem. Hulle is onbewus van hulle minderwaardige posisie. Hulle weet nie, dat selfs net 'n gedagte van Elohim, alle materie van die heelal in 'n oogwenk kan oplos en dat dit slegs Sy groot Liefde is wat dit verhoed.
            Die vrye Gees Seuntjie praat vanuit die geestelike, vanwaar Sy Vader en Hy heerskappy voer oor alles wat bestaan. Hy het nie nodig om te spog nie. Uit Hom straal slegs liefde en barmhartigheid. Selfs Sy antwoord is 'n liefdesdaad, want dit kan dalk die ander outjie van sy verdoemende hoogmoed red!

Posted by at

No comments:

Post a Comment

Subscribe to: Post Comments (Atom)