Twee verskillende beleggings
Min mense het 'n oorvloedige oudag.
Jy het jou lewe lank hard gewerk en uitgesien om 'n ontspanne en rustige oudag,
sonder finansiële bekommernis te kan geniet. Vir minstens 90% van ons realiseer
die verwagting glad nie. Waarom nie?
Kyk na beleggings. Min mense is
tussen 20 en 30 jarige leeftyd bekommerd oor 'n rustige oudag, want op daardie
ouderdom lyk die oudag ver in die verskiet, maar daar is tog 'n paar wat deur
'n finansiële raadgewer oorreed word om te begin spaar vir aftrede.
Voorbeeld: Ek is nou 80. 60 jaar
gelede was ek oorreed om 'n lewenspolis uit te neem. Die maandelikse premie
was, soos dit vandag lyk, baie laag, maar dit het 10% van my inkomste beloop.
By afsterwe sou die polis R4,000 uitbetaal. [Dit het niks met aftrede te doen
nie, maar ek wil die waardevermindering van geld uitwys] In 1952 kon 'n mens
met 1 sent heelwat meer koop as wat jy vandag met R1 kan koop. Wat ek probeer
sê, is dat ek waardevolle geld gebruik het om die premie te betaal. Die geld
waarmee ek die premie betaal het, het ook geleidelik minder werd geword, maar
die premies wat ek die eerste 3 jaar betaal het, was vergeleke met vandag
R8,000 en hulle sou maar R4,000 betaal by afsterwe! Dit wil lyk asof inflasie
my deeglik bygekom het! Dit is 'n probleem met enige belegging. Jy begin
waardevolle geld belê en dan word waardelose geld aan jou terug betaal, waarop
jy dan ook nog belasting moet betaal!
'n Uiterste geval het in Zimbabwe
aan die lig gekom. 'n Hoë amptenaar in die staatsdiens, se weduwee kon heel
goed lewe van haar oorlede eggenoot se pensioen, maar na Robert Mugabe se
geldskepmanie, wat 2,000,000% inflasie tot gevolg gehad het, kon sy met haar
maandelikse pensioen slegs een brood koop.
Wie beskerm jou belegging? Jou
makelaar? Ek glo nie! Hulle beplan gewoonlik vir jou 'n portefeulje wat vir
hulle die meeste kommissie in die sak bring. [Daardie kommissie is ook
waardevolle geld]. Rente op 'n spaarrekening by 'n handelsbank, gedurende lae
rentekoerse van die reserwe bank, is heeltemal onvoldoende en verg 'n reuse
belegging om van te kan lewe.
As belegger word jy nou oorval deur
talle ‘aasvoëls’ met allerande skemas. Respektabele ondernemings se name word
gebruik, maar as die beleggingsplan vou, is dit nooit hulle skuld nie. Piramide
skemas staan soos paddastoele op en baie persone wat beheer oor hulle kapitaal
het, val ten prooi van gladdebek bedriërs. Of die verskuiwing van jou geld uit
nood, of uit gierigheid gebore is, maak geen verskil nie, almal sit uiteindelik
sonder 'n sent.
Versekerings polisse het dieselfde
kwesbaarheid as beleggings wanneer die inflasie gogga sy honger stil, maar
tydelike kontantvloei probleme laat baie mense hulle polisse afkoop, of selfs
verval. Dit wil voorkom asof versekerings maatskappye dit lonend vind.
Mense wat aftree kry gewoonlik 'n
pakket en dit is waarskynlik die grootste enkele bedrag waaroor hulle ooit
beheer gehad het. Ondernemende mense gebruik daardie geld om 'n besigheid te
begin. Ooroptimisme en 'n gebrek aan ondervinding kan so 'n onderneming, wat
juis aangepak word om inflasie hok te slaan, laat misluk. Feit is dat 90% van sulke
ondernemings, volgens statistieke, nie suksesvol is nie! [2016. Die regering beoog ‘n wet dat slegs 30%
van die pensioen van ‘n werknemer met aftrede of bedanking uitbetaal mag word.
Die res moet in annuïteite belê word. Goed of sleg? Goed, omdat dit die risiko
van ‘n swak eie belegging verminder, maar hoe veilig is die ander 70% wat later
uitbetaal sal word? Die amper 10% waardevermindering van geld maak dit amper
onmoontlik om enige werklike vermeerdering van daardie kapitaal te verwag! ‘n
Ander probleem is, dat deesdae groot somme geld dikwels net eenvoudig tussen
neus en oë, uit die ‘veiligste bewaring’ verdwyn.]
Jy wil tog 'n goeie oudag geniet,
maar hoe? Om inflasie te klop kan jy belegging in goud probeer. Gedurende 1963
was die goudprys $39 per oz. en 'n dollar kon gekoop word vir R0-72, dus was
die prys van goud R28 per oz. Ek kon goud koop vir R924 per kilogram. Ek het
R10,500 beskikbaar gehad, as ek nie ‘n huis gebou het nie en kon dus 11kg goud
koop, wat nou R4,500,000 werd sou wees. [12/01/2016 Die Rand se waarde het nou
so gedaal dat die 11 kilogram goud nou R6,000,000 werd is]. Sou dit 'n goeie
belegging wees? Wat kos 'n 300 vierkante meter huis vandag? Ek het darem die
gebruik van die twee huise gehad!
Die probleem met 'n belegging in
goud is die bewaring daarvan. Selfs al sou 'n handelsbank dit bewaar is dit nog
nie 100% veilig nie. Wanneer goud gekoop word moet al jou gegewens verskaf word
en dit maak jou baie kwesbaar, want ongewenste persone kan die gegewens bekom.
Belegging in eiendom lyk baie
belowend as jy die eienaar is, maar daar is ook 'n probleem. ‘n Politieke leier
het gaan kers opsteek by ‘n berugte staatspresident en hy glo nou vas 'n plaas
word nie gekoop nie; dit word gevat! Die diefstal sal waarskynlik na alle
eiendom uitgebrei word. In 'n beskaafde land sal dit waarskynlik nie gebeur
nie, maar in Afrika is enigiets moontlik.
Daar is nog 'n probleem. Mediese
koste het geweldig toegeneem. Byna elke ekonomies aktiewe persoon het 'n mediese
skema of 'n hospitaal plan. Die skemas word jaarliks duurder en dit skep
probleme. Die mediese behandeling raak ook doeltreffender, in so 'n mate dat
die lewensverwagting aansienlik verleng word en nou gaan jou langer lewe 'n
bykomende las op jou aftree pakket plaas. Nou is jou aftree periode amper net
so lank soos jou werkende periode waartydens jy doeltreffend voorsiening kon
maak vir jou oudag! Daar is bereken, dat die helfte van dit, wat in totaal in
jou lewe op medies gebaseerde koste bestee word, gedurende die laaste 6 maande
van jou lewe uitgegee word!
Gesien in die lig van al die probleme met
voorsiening vir jou aftrede, was jy byna voortdurend besig met materiële dinge.
Het jy tyd gehad vir die geestelike? Ek praat nie van die uur wat jy moontlik
gedurende die Sondag oggend in die kerk deurgebring het nie, want selfs daar
het jy moontlik die tyd verwyl deur te dink wat jy Maandag nog moet doen. Selfs
dit wat jy, as lidmaat van die gemeente, so ywerig gedoen het, was tot 'n groot
mate gerig op uitbreiding van die kerk. Was die bou van die kerksaal en die
finansiering daarvan prioriteit nommer een? Dan was selfs jou godsdiens materie
gebonde.
Dit raak nou duidelik waarom jy
langer wil lewe, want jy is nie seker wat aan die ‘ander kant’ op jou wag nie.
Jou vrees maak die ontsettend duur mediese behandeling noodsaaklik! Die rustige
oudag het nou onrustig geraak en is alles behalwe 'n plesier, want nou raak
alles verteer waarvoor jy jou lewe lank gewerk het.
Kom ons kyk na 'n ander belegging.
Lees
Matt 25:33-46 dan sal jy begryp waarom sommige mense so bang is vir die dood.
Daar gaan 'n skeiding plaasvind!
Net soos wat jy van jou inkomste
opsy kon sit vir 'n belegging in 'n bank, bougenoodskap, of in watse
onderneming ookal, kon jy dit ook gebruik het om jou naaste wat in nood verkeer
te help. So 'n belegging kan nie gesteel word nie en kan ook nie in waarde
verminder nie, want dit word onmiddelik ‘verreken’!
Nou moet ons eers die twee ‘pensioenskemas’
vergelyk. Die bestaande skema, in die materialistiese wêreld, is slegs vir
relatief ryk mense ontwerp. Die relatief arm mense het nie die geleentheid om
voorsiening te maak vir hulle oudag nie. Die ryk mense het self geen waarborg
dat hulle skema hulle nie in die steek gaan laat nie. Hulle skema stel eise ten
opsigte van minimum premies, maar vir ongewaarborgde versorging vir hulle
oudag, en kan hulle brandarm laat.
Die alternatiewe ‘belegging’ stel
geen eise ten opsigte van rand en sent nie, dit is vrywillig en daar is talle ‘betaalmiddele’
wat vir die ‘betaling van die premie’ gebruik kan word. Gevolglik sluit hierdie
‘pensioenskema’ niemand uit nie! Dit is beskikbaar vir almal – van die rykste
tot die armste.
Wat kan
gebruik word om jou ‘premie’ te betaal? Omdat die hoofdoel van jou bestaan nie
is om geld te versamel nie, sal jy waarskynlik nie in staat wees om die
materialistiese pensioenskema te bekostig nie en sal jy tot jou geluk die
alternatiewe ‘pensioenskema’ gebruik, indien jou geloof daartoe in staat is,
dan het jy 'n wye keuse van ‘betaalmiddele’. Ons noem net 'n paar voorbeelde:
Die was en stryk van 'n arm kind se
skoolhempie.
Die opmaak van 'n siek persoon se
bed.
Vervoer vir iemand wat nie oor
vervoer beskik nie.
'n Blinde oor 'n besige straat help.
'n Verswakte oue by 'n trappie op help.
'n Bemoedigende woord of aanraking.
'n Gedeelde sny brood.
'n Geselsie met 'n eensame.
Selfs net deernis kan 'n premie
betaal; dis aanvoelbaar.
Wanneer
fisiese geld gebruik word kan in gedagte gehou word dat die een sent van die
arm weduwee meer waarde het as die duisend Rand van die miljoener. Dis die
gesindheid wat van belang is om die waarde te bepaal.
Lank gelede het ek na 'n preek
geluister, die predikant het gese; "jou bydrae moet jou seermaak". Ek
weet nie wat sy motief was nie – alhoewel dit verdag klink – want 'n blymoedige
gewer kry nie seer nie! Daar word nog talle maniere in die Woord genoem
waarvolgens die ‘premies van die pensioenskema’ betaal kan word. Veral Matt.
25:35,36.
Wie
moet jy in sy nood help? Die antwoord is baie duidelik in Matt 25:40 "...: Voorwaar Ek sê vir julle, vir
sover julle dit gedoen het vir een van die geringstes van hierdie broeders
van My, het julle dit aan My gedoen." Joh 13:1 "..., en omdat Hy Sy eie mense
in die wêreld liefgehad het..." Ons weet nou presies aan wie ons
barmhartigheid moet bewys.
Dit is te verstane dat mense, wat
net ingestel is om geld te versamel bang sal wees vir die dood. Is dit dan nie
beter om die alternatiewe belegging te probeer nie? Waar geen mot of roes
bestaan nie!
Hierdie belegging is ook nie so
eenvoudig as wat dit op die oog af lyk nie! Dit moet volgens sekere reëls
gedoen word. Lees Matt 6:1-4 "...
Laat jou linkerhand nie weet wat jou regterhand doen nie, sodat jou
liefdadigheid in die verborgene kan wees; en jou Vader wat in die verborgene
sien, Hy sal jou in die openbaar vergelde". Die manier waarop die
meeste mense liefdadigheid beoefen kanselleer dit as 'n belegging. Mevr. ‘Goedheid’
gebruik haar vrye tyd om ander mense te oortuig om bydraes te gee vir 'n
welsyns organisasie. Sy word geprys deur almal, wat van haar optrede bewus
gemaak word deur koerante, radio en televisie. Sy geniet die blootstelling en
verbeur die ‘belegging’, want "...
sy het haar loon weg." Dikwels gebeur dit ook dat die bydraers se name
gepubliseer word, met die bedrag daarnaas, hulle het ook hulle loon weg!
Daardie loon word net so waardeloos soos die geld wat jou pensioenfonds of
annuïteit aan jou uitbetaal!
Om liefdadigheid te bewys, omdat
barmhartigheid deel van jou leefwyse is, dan is die belofte soos beskryf in
Matt 6:31-33 op jou van toepassing. Daardie belegging is nie net in die
hiernamaals nie, maar baie duidelik ook 'n belegging vir jou oudag! Hoe
wonderbaar is Sy genade! Daar word nie net vir jou gesorg gedurende jou oudag
nie, maar ook aan die ‘ander kant’! Jy kan werklik rustig voortgaan en het nie
nodig om so lank as moontlik aan die lewe gehou te word nie, want jy sal geen
vrees hê vir wat na jou afsterwe sal wees nie!
Is dit nie die beste belegging wat
jy ooit in jou lewe kan doen nie?
No comments:
Post a Comment